Пражская адысея

У лістападзе на турыстычнай карце НЦЭП з’явіліся новыя адзнакі: у рамках першаснай прафсаюзнай арганізацыі арганізаваны экскурсійны тур у прыгажуню-Прагу і велічны Дрэздэн.

Нам запомніліся ўтульныя пражскія вулачкі, брукаваныя каменем, газавыя ліхтары, чарапічныя дахі, паркі – усё тут прасякнута духам даўніны і велічы. Вабны пах свіной рулькі ў пражскіх кафэ і традыцыйнага чэшскага піва, многія з гатункаў якога ўжо атрымалі сусветнае прызнанне, – таксама неад’емныя атрыбуты гарадской атмасферы.

Зусім іншым здаўся строгі Дрэздэн з яго палацавымі ансамблямі, замкамі, палацавай царквой і Брульскай тэрасай. Асаблівае ўражанне зрабіла Дрэздэнская карцінная галерэя, якая захоўвае такія шэдэўры, як “Сіксцінская мадонна” Рафаэля, “Спячая Венера” ​​Джарджонэ, “Шакаладніца” Ліатара і палотны іншых майстроў жывапісу эпохі Адраджэння.

Цяперашняе падарожжа ў Чэхію і Нямеччыну стане асаблівай старонкай у фотаальбоме НЦЭП нароўні з папярэднімі ваяжамі у Польшчу, Латвію, Эстонію, Швецыю, Венгрыю, Украіну.